Америка и Европа заедно ќе произведуваат ракети
САД и Германија денес на самитот на НАТО во Анкара ќе го објават формирањето центар за производство на ракети во Европа, објави „Еурактив“.
Препорачано
Американската администрација и германската влада најавија планови за воспоставување европски производствен центар за тактичката балистичка ракета АТАЦМС за време на самитот на НАТО, што претставува голем чекор во трансатлантската соработка во одбранбената индустрија.
По неколку месеци неизвесност околу проектот, сега е потврдено дека ракетите АТАЦМС ќе се произведуваат во фабриката на „Рајнметал“ во Унтерлис, во северна Германија.
Со ова, за првпат американски оружен систем од оваа категорија ќе се произведува целосно надвор од САД.
Планираниот заеднички потфат меѓу германскиот производител на оружје „Рајнметал“ и американската компанија „Локид Мартин“ ќе воспостави европски центар за производство, интеграција и за испорака на ракетите АТАЦМС за членките на НАТО и за сојузничките европски вооружени сили.
Што може да направи ATACMS-системот со кој Украина ќе стрела длабоко во внатрешноста на Русија?
Според информациите на „Еурактив“, американската администрација неодамна силно лобирала во корист на проектот, што било позитивно прифатено во Берлин.
Ракетата АТАЦМС има дострел од 300 километри и може да се лансира од системите за повеќекратно ракетно исфрлање М142 ХИМАРС и М270.
Тактичката ракета главно се користи за напади врз цели со голема вредност. Украина ги користеше ракетите АТАЦМС за уништување командни центри, складишта за гориво и логистички центри, како и важни воени системи, меѓу кои и радарскиот систем „Небо-М“.
Украински воени извори изјавиле за „Еурактив“ дека АТАЦМС се покажала како исклучително ефикасна на бојното поле, но предупредиле дека нејзиното влијание е ограничено поради малиот број достапни ракети. Ова ограничување би можело да се намали со новиот производствен капацитет.
Според американски претставници, АТАЦМС била успешно употребена и за време на американската воена операција против Иран, која започнала на 28 февруари.
