Кога надвор е топло, не сакаме да трошиме премногу време на термичка обработка на храната, згора на тоа, воопшто не сакаме да го вклучиме шпоретот. Кускус салата со туна и зеленчук е идеален рецепт за вакви денови.

За да го зготвите кус-кусот, не треба да го вклучувате шпоретот, доволно е да загреете вода во електричен бокал, да ја прелиете врз ситните зрна пченичен гриз и да оставите да кисне околу пет минути. Ако немате електричен бокал, можете да ја загреете водата и во микробранова печка.

Додека се кисне кускусот, исечкајте го зеленчукот, измешајте го со конзервирана туна и сè убаво зачинете, а потоа уживајте во лесен, брз и вкусен ручек.

Состојки:
250 мл топла вода
170 г кус-кус
1 голема конзерва туна во масло
1 голем домат
1 краставица
½ мал виолетов кромид
½ пиперка
грст маслинки
сол и бибер по желба
сок од лимон
свеж магдонос по желба

Подготовка:
Загрејте ја водата во електричен бокал и прелијте го кус-кусот. Оставете го да кисне околу пет минути.

Доколку сакате кус-кусот да има пополн вкус, можете да стопите коцка зеленчук во топлата вода пред да ја измешате со кус-кусот.

Исчистете го кромидот и исечете го на тенки ленти. Исечкајте ги доматот, краставицата, пиперката и маслинките.

Во поголем сад измешајте ги зеленчукот и конзервираната туна заедно со маслото. Зачинете со сол и бибер и додадете сок од лимон по желба. Додајте го сварениот кускус, сè убаво измешајте и послужете со сечкан свеж магдонос. Добар апетит!