Најдобрата хрватска атлетичарка збесна: Ние не можеме да имаме нормален тренинг, а Американците имаат свој стадион за тренинзи
Главната фаворитка за освојување на златен медал во фрлање диск на Олимписките игри во Токио, Сандра Перковиќ, е бесна на организаторот бидејќи немаат соодветни услови за тренинг.
Организаторот на натпреварувачите во фрлање диск и во фрлање кладиво им одредил само еден круг и тоа за двете конкуренции, и машка и женска.
– Имам ужасно големи проблеми со условите. Стадионот за тренинзи има само еден круг за кладиво и за диск, а тука имаме 32 натпреварувачки во фрлање диск, исто толку има и во машка конкуренција, па исто толку и во фрлање кладиво. Значи вкупно околу 130 атлетичари користат само еден круг за тренинзи. А некој пат во нашите термини ги ставаат и натпреварувачите во фрлање копје – вели Перковиќ која е свесна дека не може максимално да се подготвува за својот настап.
– Последниот тренинг пред квалификациите го започнав во 9.30 часот наутро, а згора на тоа брзавме за да стигнеме што порано и фрлав до 11.47 часот. Значи два часа и 17 минути и во тоа време успеав само седум пати да го фрлам дискот.
Перковиќ вели дека не е иста ситуацијата за сите атлетичари, таа открива дека Американците се привилегирани и се им е дозволено.
– За да биде работата уште полоша, сите ние во олимпиското село имаме забрана за движење и секое утро не тестираат на корона, но затоа Американците имаат свој стадион на кој можат да тренираат и до кого имаат дури и службен превоз. Тие можат да тренираат колку сакаат и кога сакаат и сето тоа ИОК им го дозволува. Колку што знам, во олимпискиот дух е сите да сме сместени на исто место, сите да јадеме иста храна и сите да се бориме на исти борилишта – вели лутата Перковиќ.