На Пониква се одржа традиционалниот влашки етно фестивал „За Петровден сите на планина”

фото: МИА

Во планинскиот туристички центар Пониква на Осоговските Планини се одржа традиционалната меѓународна средба на Власите „За Петровден сите на планина”, чиј организатор е пејачката група „Грамостеањ” од Скопје.

Во рамки на манифестацијата се одржа и дванаесеттиот фестивал на влашки фолклорни ора и песни, на кој учествуваа десетина ансамбли од неколку градови во државата, како и од соседна Бугарија.

– Ова дружење е одлична можност да ја презентираме. но и да ја зачуваме културната традиција на Власите, кои токму на падините на Осоговијата некогаш ги имале најбројните стада овци и поголем дел од годината го поминуале овде. Празникот Петровден за нас има посебна важност затоа што од дамнина бил период на дружба и собири на кои тогашните млади се запознавале, правеле веридби или свадби. Сакаме сеќавањето на тие времиња да остане, со оглед што денес сè повеќе млади ја напуштаат државата и се иселуваат во странство, истакна Ѓорѓи Николов претседател на здружението „Грамостеањ”.

На отворањето на фестивалот, присутните учесници и гости ги поздрави градоначалникот на Кочани, Николчо Илијев, кој рече дека Општината како домаќин дава целосна поддршка оваа манифестација да продолжи и во иднина, нагласувајќи ја важноста на културната, економската и другата соработка меѓу сите етнички групи во регионот и пошироко.

Традиционалниот влашки етно фестивал на Пониква е дел од манифестацијата “Петровденски конаци” што се одржува по повод верскиот празник посветен на Свети Петар, заштитникот на Кочани.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот