Хрватскиот ракометен стручњак, Лино Червар денеска, во „Офицерскиот дом“ во Битола и официјално беше претставен за нов тренер на Еурофарм Пелистер. На промоцијата, се обрати и првиот човек на „зелено-белите“, Зоран Стерјев, кој зборуваше за плановите за следната сезона, а во фокусот беше и ситуацијата со Филип Кузмановски и Дејан Манасков, чии договори истекуваат летово.

„Ситуацијата со Манасков и Кузмановски е отворена и тоа е така поради нивна страна, клубот им понуди нови договори. На Кузмановски му е понуден двегодишен договор, а на Манасков едногодишен. Водиме преговори, клубот максимално ги почитува и двајцата и во рамките на своите можности правиме сè за тие да бидат тука и наредната сезона. Сепак, на крајот заедно ќе треба да ја донесеме одлуката. Мислам дека ние како клуб направивме многу за нив. Кај нас задоволството е големо од прикажаното од нив двајца, но и тие треба да знаат дека минатата сезона не беше успешна за нас, поточно не ги остваривме зацртаните цели“, изјави Стерјев.