Атлетико Мадрид вчера направи изненадување и со 1:0 го совлада европскиот шампион во првиот осминафинален натпревар во Лигата на шампионите.

Мадриѓаните сите дилеми ги решија уште во четвртата минута со голот на Саул Нигуез, и на реваншот кој се игра идниот месец (11 март) на „Енфилд“ ќе имаат минимална предност.

Напаѓачот на Атлетико, Алваро Мората веќе го отпиша европскиот шампион со изјавата дека не сака во четвртфиналето да игра против Јувентус. Одговорот дојде експресно, од голманот Адријан.

– Нашите шанси во реваншот? На „Енфилд“ никому не му е пријатно. Тоа можате да ги прашате оние од Барселона – изјави Адријан.

Голманот со оваа изјава алудираше на минатата сезона и полуфиналните пресметки со Барселона. Првиот натпревар на „Камп Ноу“ заврши со триумф на шпанскиот тим од 3:0, но во реваншот Ливерпул славеше со 4:0 и се пласира во финалето каде со 2:0 го совлада Тоетнхем и дојде до шестата европска титула.