Италијанецот на патеката „Моторленд“ дојде до втората победа оваа сезона во најсилната класа, а вкупно 10. во кариерата.
Второто место со две секунди заостаток му припадна на Алекс Ринс од Сузуки, додека последното место на победничкиот подиум му припадна на вториот возач на Сузуки, Жоан Мир кој задоцни дополнителни три секунди.

Морбидели на втората трка која се возеше во Арагон, водеше од стартот па се до крајот, освен на неколкуте први свиоци кога лидерската позиција ја имаше Такаки Накагами од ЛЦР Хонда.
Јапонецот ја стартуваше трката од пол позицијата, но направи голема грешка и излета од патеката во моментот кога зад него беа Морбидели и Алекс Ринс.

Не им беше потребно многу време на водечките Морбидели и Ринс да се одвојат од конкурентите, а разликата помеѓу нив беше помала од една секунда. Италијанецот во последните кругови го засили темпото и направи предност поголема од една секунда која му донесе мирен финиш на трката.
На четвртото место се пласира возачот на КТМ, Пол Еспарегаро, додека Жоан Зарко од Авинтија заврши на петтата позиција.
Жоан Мир со освојувањето на третото место ја зголеми предноста во генералниот пласман, но на три трки до крајот на шампионатот борбата за титулата е неизвесна. Возачот на Сузуки е лидер со 137 бода, додека Квартараро е втор со 14 бода помалку, додека Вињалес има 118 бода.
Наредната трка во Мото ГП шампионатот ќе се вози на 8. ноември кога на патеката Рокардо Тормо ќе се вози трката за Големата награда на Европа.