Премиерот на Сараевскиот кантон, Нихад Ук, кој поднесе оставка, денеска се обрати на јавноста на прес-конференција на која зборуваше за моменталната состојба во врска со трагичната трамвајска несреќа во која загина 23-годишниот Ердоан Моранкиќ, а уште четири лица беа повредени, објави Кликс.ба.

Тој поднесе оставка во неделата по секојдневните масовни протести на граѓаните, кои бараат одговорност и исполнување на нивните барања. Со неговата оставка беше соборена Владата на Сараево, која ја водеше три години.

„Кога ја презедов одговорноста, знаејќи ги и позитивните и негативните страни, си поставив цел, колку и да трае мандатот, по него да можам да одам исправено по улиците, без никаков срам. Во рок од 72 часа, имавме три седници на Владата, бевме на терен и ги посетивме повредените. Ги следевме протестите што се случуваа, можев да видам колеги од улица, познаници – тоа не беа луѓе увезени во нашиот град. Тие покажаа незадоволство од властите, го слушнав тоа. Младите луѓе повикаа исто така, на моја оставка. Мојата оставка не е бегање, туку преземање одговорност“, рече Ук.

Тој додаде дека ниту еден проект нема да запре до изборот на новата Влада на Кантонот Сараево и дека дотогаш ќе продолжат да работат.

„За жал, трагедијата се случи во секторот во кој беа направени најмногу инвестиции. Стотици милиони КМ беа инвестирани во јавниот градски превоз. Откривме над 300 милиони КМ долг. Поднесени се голем број кривични пријави – вклучени беа 47 лица – но, за жал, ништо не се случи. Друга институција што ја зајакнавме беше Обвинителството на Кантонот Сараево. Инсистирам да се отворат случаи и одговорните за ситуацијата во ГРАС да бидат гонети. Ја поздравувам одлуката на директорот да поднесе оставка. Најважно е конечно да се воспостави деловен процес во рамките на оваа компанија што ќе гарантира безбедност“, рече Ук.

Тој рече дека сите стари трамваи се повлечени од јавниот превоз и дека ниту еден нема да биде ставен во сообраќај без јавно објавување на состојбата.

„Охрабрен сум од информацијата дека нашата Ела моментално е стабилна“, рече Ук.

Се разбуди од кома тинејџерката која остана без нога во кобната трамвајска несреќа во Сараево – Слободен печат

Зборувајќи за новата Влада на КС, Ук рече дека сега тоа е прашање на парламентарна процедура.

„Не сме разговарале со партнерите. Мојот фокус е исклучиво на трагедијата и работите што мора да се решат оперативно во функционирањето на КС. Политичарите ќе одлучат за чекорите што треба да се преземат во врска со назначувањето на новата Влада на КС. Сè е отворено, но се надевам дека оваа Влада нема да остане до изборите. Очекувам дека политичарите, без разлика дали се позициони или опозициски, ќе се договорат и дека ќе го завршиме тоа“, рече Ук.

Тој рече дека неговата оставка не е чин на спасување на некого, туку чин на одговорност кон граѓаните на Сараево.

И денеска, петти ден по ред се одржува протест во Сараево, во организација на неформална група студенти. Граѓаните бараат објавување на целосни информации за истрагата, вклучувајќи податоци за трамвајскиот сообраќај и снимки од трамвајот во времето на несреќата, повлекување на сите стари трамваи додека не бидат повторно сервисирани, а информациите за нивната исправност да им се доставуваат на граѓаните, оставки од сите одговорни лица, безбеден јавен превоз и суспензија на приватизацијата на јавниот градски превоз.