Спортското радио 90.3 ФМ слави 20 години постоење, и тој повод ќе се организира ракометен спектакл во Скопје, во СЦ „Јане Сандански“.

Овој настан е закажан за в среда (29 октомври) со почеток од 19.00 часот, Легендите на сцена, Македонија против Европа.

Публиката ќе има уникатна можност повторно да ги види на дело најголемите македонски ракометни имиња – Кирил Лазаров, Борко Ристовски, Стојанче Стоилов, Пепи Манасков и многу други, како и врвни ѕвезди од регионот и Европа.

Влезници за овој спектакл има онлајн на следниот линк ТУКА, во билетарницата на СЦ „Јане Сандански“ и во продажната мрежа на TicketX низ цела Македонија.

На денешната прес-конференција по овој спектакл говореа славниот тренер Лино Червар, поранешната легенда и двократен европски шампион со Вардар, Данил Шишкарев, како и нашите поранешни репрезентативци, Филип Миркуловски и Стојанче Стоилов.

– Среќен сум што сум тука во Скопје со пријателите, луѓе кои го сакаат ракомет. Луѓе кои се заслужни за мојата кариера, секој на свој начин, што ми помогнаа. Спортот е единственото нешто може само да ги собере луѓето, да се учат децата по пример на тимскиот дух, тоа е важно, како и грижа уште повеќе и среќа за другите луѓе. Се гледаме на спектаклот – вели Червар.

– Огромна чест е да се биде тука, да бидам на теренот на „Јане Сандански“, и тоа е огромно задоволство. Повторно гледав натпревар од првенството во Скопје, се разбудија спомени кога ја видов пак салата и самата атмосфера, се наежив. Со големо задоволство се вратив во Скопје и драго ми е што ќе бидам дел од спектаклот в среда со луѓе кои поминавме убави денови на терените – се зборовите на Шишкарев.

– Да им го честитам роденденот на Спортско радио 90.3 фм, 20 години не е мала работа. Мило ми е што се решија за еден ракометен натпревар да го прослават овој роденден, тоа докажува дека ракометот е спорт 1 во Македонија. Чест и задоволство е да се биде тука со ракометни имиња, играчи, легенди, тренери. В среда можам да ветам многу забава, за квалитетот на натпреварот не многу, да беше пред пет-шест години, да, но ќе видиме. Ветуваме забава, и сите заедно да се дружиме да го прославиме роденденот на Спортско радио – вели Миркуловски.

– Честитки, роденден 20 години на Спортско радио 90.3, не е мала работа. Ќе ми биде чест да го делам теренот со играчи, поранешни ракометари, се надевам со забава, заедно ќе направиме спектакл – кажа Стоилов.