Миленковски: „Комити“ се 100% газди на клубот, се бара институционално решение за ФК Вардар
Фудбалскиот клуб Вардар на прес-конференција ги презентираше најновите информации во контекст на новата сопственичка структура со доминантно поседување на акциите на клубот.
Беа официјални промовирани новите раководни луѓе во спортската структура (од првиот тим до најмладите категории). Официјално, Александар Васоски е новиот тренер на ФК Вардар, а Ѓоко Хаџиевски ќе биде спортски директор на скопските „црвено-црни“.
Еден од првите луѓе на навивачката група „Комити“, Милорад Миленковски изјави дека пред два дена завршени се сите процедури, Здружението 35 години Вардарци зад кое стои навивачката група „Комити“ ја презема и раководната структура, и 100% од акциите на ФК Вардар.
– Јасно ќе се обратиме до инстутициите од кои добивме некои ветувања, дека нашиот дел од работата го завршивме, сега сте вие на потег. Ова не значи дека имаме амбиции да бидеме газди на клубот. Се бара институционално решение за ФК Вардар, не времено, туку трајно решение. Бараме клубот да биде во статутот на Град Скопје и на општините. Апелираме до компаниите кои сакаат да изразат желба да инвестираат во ФК Вардар и биле дел од еден проширен управен одбор со цел нормално функционирање на клубот – вели Миленковски.
Воедно Миленковски додаде дека распределбата на ветените средства од Град Скопје Вардар ќе ги добие, треба да помине уште една седница на советот. Станува збор за сума од десетина милиони денари како помош за Вардар нормално да функционира до декември.
– Беше моја морална одговорност да прифатам и да му помогнам на клубот кога му е најтешко. Вардар мене ми даде многу, потоа заминав во Германија, а пред три години бевме шампиони на Македонија, по што следуваше моето заминување поради неиздржливата состојба во клубот. Посакувам и се надевам дека Вардар ќе „заплива“ во подобри води, вчера дојдовме до бод против Силекс што е мал напредок. Се надеваме дека во следниот период ќе се засилиме со уште двајца-тројца играчи. Воедно со Хаџиевски ќе се потрудиме да вложиме со наши контакти од странство, од Србија, од Хрватска, да дојдат фудбалери на позајмица, да помогнат, бидејќи финансиите се тенки – рече Васоски.