Премиерот на Грција Киријакос Мицотакис денеска оствари средба со претседателката Катерина Сакаларопулу со цел одблизи да ја информира за справувањето на земјата со корона вирусот како и со последиците предизвикани во економијта.

Ова е прва нивна директна средба откако таа стапи на функцијата, имајќи предвид дека тоа се случи во периодот кога во земјата започнаа да се преземаат дел од превентивните мерки.

На почетокот од средбата, грчкиот премиер се осврна на „високото чувство на одговорност и солидарност на граѓаните” во однос на „дисциплинарното прилагодување” на рестриктивните мерки, додека, пак, претседателката на Грција рече дека општеството во целост покажа „импресивна зрелост” во изминатиот период.

Грчкиот премиер и шефицата на државата веќе одржаа една средба, но преку видео конференциска врска.

За време на денешните разговори, Мицотакис истакна дека неговата намера е ваквите средби да добијат редовен карактер.