Аргентинецот Лионел Меси беше претставен како ново засилување на ПСЖ. Меси на својата прва конференција во новиот клуб изјави дека е среќен што е тука и дека едвај чека да освојува трофеи.

– Беше тешко да ја напуштам Барселона, но среќен сум што дојдов во ПСЖ. Тоа е амбициозен клуб со најдобрите играчи. Тие беа сериозни и брзи за време на преговорите, веднаш по објавата на Барселона во четвртокот – се првите впечатоци на Меси по пристигнувањето во Париз.

Аргентинецот повтори дека му било многу тешко да се раздели со Барселона.

– По толку години, беше многу тешко да ја напуштам Барселона. Сепак, од моментот кога дојдов во Париз, се чувствувам среќно. Сакам да победиме и да освојуваме трофеи заедно. Ќе играм со најдобрите играчи во светот, и тоа е секогаш добро.

Пречекот кој го почувствував беше нереален. Едвај чекам навивачите да го исполнат целиот град и трибините на стадионот, ова ќе биде одлична сезона. Дојдов да помогнам, мотивиран и со желби повеќе од кога било – вели Аргентинецот.

Претседателот на клубот истакна дека доаѓањето на Меси е историско за фудбалот:

– Ова е голем и историски ден за нашиот клуб и за целиот фудбал. Лео произведува фудбалска магија – изјави Насер Ал-Келаифи.