Германскиот канцелар Фридрих Мерц денеска сугерираше дека Европската Унија би можела да ги ублажи санкциите против Техеран како дел од сеопфатен договор со кој би завршила војната со Иран, но другите лидери на ЕУ зазедоа повнимателен став, објави „Ројтерс“.

ЕУ, која брои 27 земји-членки, со години наметнува санкции кон Иран, вклучително и забрани за патување и замрзнување на имотот на високи функционери и субјекти, како одговор на прекршувањето на човековите права, нуклеарните активности и на воената поддршка за Русија.

Американските претставници сугерираа дека сеопфатен договор кој би ги опфатил иранските нуклеарни и ракетни програми и повторното отворање на Ормускиот Теснец, би можеле да донесат траен крај на американско-израелската војна со Техеран, надвор од сегашниот прекин на огнот.

По самитот на ЕУ во Кипар, Мерц изјави дека блокот би можел постепено да ги ублажи санкциите кон Иран во случај да се постигне сеопфатен договор. Европските лидери во голема мера беа потиснати на маргините во актуелниот конфликт на Блискиот Исток, но некои европски претставници ги гледаат санкциите на блокот како можен начин ЕУ да се вклучи во дипломатско решение.

– Ублажувањето на санкциите може да биде дел од процесот – им рече Мерц на новинарите по самитот во Никозија.

Европа треба да се соземе и да одбере насока

„Никој не се спротивстави на тоа“, рече тој за дискусиите на самитот.

– Тоа е, така да се каже, дел од придонесот што можеме да го дадеме за да го унапредиме овој процес и, се надеваме, да доведеме до траен прекин на огнот – додаде германскиот канцелар.

Но, претседателот на Европскиот совет, Антонио Кошта, кој претседаваше со самитот, на прес-конференција по завршувањето на состанокот рече дека е „премногу рано да се зборува за олеснување на какви било санкции“.

Претседателката на Европската комисија, Урсула фон дер Лајен, изјави дека ублажувањето на санкциите може да се случи само по јасни докази за суштински промени во курсот на Иран.

– Веруваме дека олеснувањето на санкциите треба да биде условено со верификација на деескалацијата, особено со напредок во меѓународните напори за запирање на неговата нуклеарна закана и со промена во репресијата врз сопствениот народ – рече таа на истата прес-конференција.

Иран не им наплаќа на руските бродови за да поминат низ Ормускиот Теснец