Претседателот на Претставничкиот дом на САД, Кевин Мекарти, потврди дека ќе се сретне со тајванската претседателка Цаи Инг-вен во Калифорнија оваа недела, и покрај предупредувањето на Кина дека ова може да доведе до „сериозна конфронтација“, пренесува „Би-Би-Си“.

Цаи утре ќе пристигнево САД, додека се враќа од турнејата на сојузниците на Тајван во Централна Америка.

Ланската посета на тогашната претседателка на Претставничкиот дом, Ненси Пелоси се сметаше за „голема провокација“ за Кина, која реагираше со воени вежби околу островот.

Тензиите се зголемија по спорот околу наводните шпионски балони и зголемените обиди на САД да го прекинат пристапот на Кина до напредната технологија. Мекарти ќе се сретне со тајванскиот лидер на „двопартиска“ средба во претседателската библиотека Роналд Реган надвор од Лос Анџелес. Средбата во САД, наспроти Тајван, се сметаше за компромис за да се избегне разгорување на тензиите со Кина.

Но, Пекинг минатата недела предупреди дека каква било средба меѓу Цаи и третиот највисок американски функционер може да доведе до тоа САД да видат „сериозни последици“.

Во понеделникот, портпаролката на кинеското Министерство за надворешни работи рече дека Пекинг „силно“ се противи на каква било форма на официјална интеракција и контакт меѓу владите на САД и Тајван.

САД одржуваат целосни дипломатски односи со Пекинг, но се најважниот сојузник и снабдувач на оружје на Тајван.