Големиот шумски пожар што избувна вчеравечер во близина на северните предградија на Солун, во областа Ореокастро, сè уште не е изгаснат, објави Грчката противпожарна служба.

Пламените јазици стигнале многу блиску до куќите во областите од кои граѓаните беа евакуирани синоќа, додека покрај единицата за рециклирање на фабриката, пожарот се прошири и на текстилната фабрика, што, според изјавите на противпожарната служба придонел за особено високо термичко оптоварување и го зголемил интензитетот на пожарот.

Рано утрово, започнало гаснење од воздух со два авиона и два хеликоптери, а биле издадени и наредби за дополнителна воздушна поддршка. Покрај тоа, во гаснењето на пожарот моментално се вклучени 154 пожарникари, со 52 возила и 5 пешадиски единици.

Според првите проценки, пожарот предизвикал штети, некои помали, некои поголеми, на куќи, магацини и инфраструктура, објави Катимерини.

Итната медицинска помош и болниците во областа, се во целосна оперативна готовност. Во овој момент нема извештаи за други повредени, освен неколкумина пожарникари.

Во саботата навечер, властите продолжија со превентивната евакуација на Фондацијата за хронични заболувања „Свети Пантелејмон“.

Според Противпожарната служба, 100 затвореници биле префрлени од таа институција во зграда на средно училиште, а преостанатите 57 во Психијатриската болница во Солун.

Како дел од истрагата, врз основа на собраните и анализираните докази, 76-годишен државјанин на Грција бил приведен како главен осомничен. Се претпоставува дека пожарот настанал како резултат на неговото „опасно возење“, а, како што е наведено, можно е искри од возилото да го предизвикале пожарот.

ВИДЕО | Огромен пожар беснее во Неа Каликратија, огнот се шири блиску до куќи

Мажот е испратен на дополнително испрашување, вклучително и проверка дали бил под дејство на алкохол или други супстанции во времето на инцидентот.

Истрагата и предистражната постапка се во тек, а надлежните органи работат на целосно разјаснување на околностите под кои се случил пожарот во областа Ореокастро во близина на Солун.

Пожарот избувнал во саботата навечер околу 20:30 часот по локално време во планинската област северно од градот и брзо се проширил кон рамнината, зафаќајќи претежно ниска вегетација.

Според пожарникарите, пожарот зафатил неколку деловни згради. Жителите на Антуполи, Филотеј и Галини добиле наредба за евакуација преку СМС пораки.

Пламен и чад биле видливи од Солун, додека во некои делови од градот се слушнале и експлозии предизвикани од запалив материјал во зградите погодени од пожарот. Густ чад покри неколку западни делови од градот и околните предградија.

Во исто време, неколку други пожари се активни во близина на Солун, вклучувајќи го полуостровот Халкидики, едно од најпознатите одморалишта во Грција, како и областа околу градот Килкис.