Извршниот директор на Интер, Џузепе Бепе Марота денеска изјави дека враќањето на Ромелу Лукаку на „Џузепе Меаца“ е извесно иако сè уште има пречки во преговорите со Челси.

Челси ја одби првата понуда од Интер за Лукаку која изнесуваше 6 милиони евра и порача дека ќе дозволи едногодишна позајмица за 10 милиони евра плус 2 милиони во бонуси кои би биле поврзани со настапите и головите на белгискиот репрезентативец.

– Враќањето на Лукаку во Интер е изводливо, но има потешкотии и мора да процените дали постои шанса да го реализираме овој трансфер. Затоа нема да објавиме денеска дека Лукаку се враќа – изјави Марота.

Првиот оперативец на „нераѕурите“ потврди дека преговара со Пауло Дибала кој стана слободен играч откако не се согласи да го продолжи договорот со Јувентус.

– Лукаку и Дибала се нашите желби, но мора да размислуваме и за финансиите. Преговараме со двајцата фудбалери и ќе бидеме среќни доколку потпишеме договор. Доколку не успееме, ќе бараме други решенија. Не ни се важни парите туку тимот, а ние имаме „солидна екипа“ – додава Марота.

Тој потврди дека нови играчи ќе бидат голманот Андре Онана и напаѓачот Хенрик Мхитарјан, како и дека е заинтересиран за дефанзивецот на Торино, Бремер додека ја отфрли можноста екипата да ја напушти Лаутаро Мартинез.