Македонија ја запиша и втората победа на Светското кадетско првенство
После стартниот триумф над Сенегал од 32:13, денеска кадетската женска селекција на Македонија ја забележа и втората победа на Светското првенство 2022 кое се одржува во нашата земја. Во СЦ „Борис Трајковски“ – Скопје избраничките на селекторот Љубомир Савевски триумфираа со 39:30 против Узбекистан.
Со оваа победа Македонија обезбеди пласман во главната фаза на Мундијалот. Моментно во групата „Б“ по четири бодови имаат Македонија и Иран, а ниту еден Узбекистан и Сенегал.
Противничките имаа фуриозен старт, после само шест минути игра имаа водство од 6:1. Направивме многу грешки во нападот, а ривалот кој знаеше тоа да го казни стигна највисока предност од „плус шест“ (8:2). Нашата репрезентација се консолидираше, со поцвста одбрана и сигурен напад после 20 минути на семафорот стоеше нерешени 13:13. На паузата заминавме со минимална позитива од 20:19.
Вториот дел започна со серија од 5:1, после 45 минути игра водевме со 30:23 и тоа беше најголемата предноста најмногу благодарение на индивидуалниот квалитет на Бојана Коцева. Стигнавме и двоцифрено водство од 36:26 на седум минути пред крајот на мечот. За ракометарка на мечот беше прогласена Емилијана Ризоска кој постигна осум голови, а еден повеќе Коцева. Марија Јанкуловска запиша шест погодоци, а по 10 на спротивната страна имаа Севинч Еркабаева и Сарбиназ Сапарбаева.
Третиот меч нашите млади ракометарки ќе го имаат во вторник (2 август) од 20.30 часот против Иран, а влезот за сите љубители на ракометот и спортот ќе биде слободен.
– Моите ракометарки не беа фокусирани на овој натпревар и не игравме ништо во првото полувреме. Имавме некои индивидуални квалитети и започнавме да играме добра одбрана во вториот дел. Се надевам дека ваквите перформанси од мојот тим нема да се повторат. Иран е нашиот следен противник, ќе се одмориме и ќе се подготвуваме за овој меч – рече нашиот селектор Савевски по мечот со Узбекистан.