Министерството за транспорт информира дека се работи на создавање правна основа за воспоставување авионски линии меѓу македонските аеродроми и аеродромите во Саудиска Арабија.

Како што наведуваат од Министерството, веќе е започната процедурата за потпишување Спогодба за воздушен сообраќај со Кралството Саудиска Арабија. Досега меѓу двете држави не постоел редовен воздушен сообраќај.

Целта на спогодбата е да се воспостави јасна правна рамка што ќе овозможи отворање редовни авиолинии меѓу Македонија и Саудиска Арабија.

Со документот се предвидуваат либерални и фер услови за работење на авиопревозниците, поттикнување на конкуренцијата, можност за пониски цени за патниците и воведување нови и поквалитетни услуги. Истовремено, се гарантира и високо ниво на безбедност и сигурност во воздушниот сообраќај, во согласност со меѓународните стандарди, велат од Министерството за транспорт.

Оттаму очекуваат дека воспоставувањето редовни летови ќе придонесе за зајакнување на економската соработка, развој на туризмот, зголемување на трговската размена и унапредување на вкупните билатерални односи меѓу двете земји.

Летово две нови директни авиолинии од скопскиот аеродром