„Договорот за заемот од 6 милијарди евра стана централна тема во јавноста, особено поради сериозните дилеми што ги отвора“, вели пратеничката од СДСМ, Сања Лукаревска.

Во гостувањето на ТВ „24“, Лукаревска рече дека сè уште нема јасни одговори од Владата за клучните аспекти на договорот – колкава е каматната стапка, кој е грејс-периодот, рокот за отплата, како ќе влијае заемот врз јавниот долг и кој ќе биде контролниот механизам.

„Се поставуваат сериозни прашања за транспарентноста и отчетноста. Дали има направено споредбени анализи, на пример со понудите од Светската банка?“, праша Лукаревска, додавајќи дека без овие информации, тешко може да се процени дали заемот е во интерес на државата или не.

Во дебатата учествуваше и Амар Мециновиќ од „Левица“, кој ја обвини Владата дека води „расипничка политика“ и дека јавните претпријатија, како АД ЕСМ, го зголемуваат долгот со голема брзина. Тој предупреди дека, ако продолжи ова темпо на задолжување, државата ќе се соочи со потреба од реструктурирање на долгот.

Од друга страна, Љупчо Пренџов од ВМРО-ДПМНЕ тврди дека заемот ќе овозможи спроведување на капитални проекти и подобрување на животниот стандард.