ЛШ: Коронавирусот го одложи и дербито Веспрем-Барселона!
После еден од низата редовни тестови на ковид-19 направени минатиот петок, резултатите покажаа дека тројца членови на стручниот штаб на шпанската Барселона се позитивни, па затоа е донесена одлука целиот тим да биде во карантин 10 дена, почнувајќи од 17 октомври.
Од тие причини, каталонскиот гигант побара одложување на натпреварот од петтото коло во Лигата на шампионите против унгарскиот Веспрем на македонскиот репрезентативец Дејан Манасков, како и на мечот од шпанското првенство против Бенидорм.
– Заразените членови на Барселона се добро, не чувствуваат симптоми и ќе ги почитуваат сите пропишани мерки – се наведува во соопштението на Барселона.
Ова не се првите случаи на коронавирус во најтрофејниот европски клуб, претходно синот на тренерот Чави Пасквал, Алекс имаше ковид-19, а потоа и Каспер Мортенсен доби позитивен резултат на тестот.
Токму екипите на Барселона и Веспрем, заедно со данскиот Алборг моментно ја делат првата позиција на табелата во „Б“ групата со по осум бодови од четири максимални победи.