Во првиот натпревар од второто квалификациско коло во Лигата на шампионите ремизираа екипите на Жалгирис и Галатасарај со резултат 2:2. Литванскиот Жалгирис беше тимот кој во првото квалификациско коло успеа да го елиминира македонскиот првак Струга Трим Лум.

На денешниот дуел немаше голови по првото полувреме, а изненадувачки водеше Жалгирис од 48 минута со погодокот на Ојевуси. За период од 180 секунди Турците успеаја да направат пресврт со головите на Бардакџи во 75 и Дервишоглу во 78 минута.

Во самиот финиш од средбата (90+2`) домаќините го избегнаа поразот благодарение на Казлаузкас.

Реваншот ќе се игра на 2 август во Истанбул, а победникот во третото квалификациско коло на ЛШ ќе се сретне со подобриот од двомечот Лудогорец (Бугарија) – Олимпија Љубљана (Словенија).

Финскиот ХЈК пред возвратната пресметка во Норвешка пред своите навивачи обезбеди минимална позитива по победата од 1:0 над Молде. Стрелец на голот беше Кескинен во 25 минута.

Македонскио репрезентативен голман Дејан Илиев за овој меч беше меѓу резервите на ХЈК. Реваншот помеѓу Молде и ХЈК ќе се игра на 2 август, а победникот во третото квалификациско коло ќе се сретне со подобриот од пресметката Клаксвик (Фарски Острови) – Хакен (Шведска).