Иако Еурофарм Пелистер е последен во групата „А“ без освоен бод во ЕХФ ракометната Лига на шампионите, ППД Загреб очекува исклучително тешко гостување в четврток (18.45 часот) во 10 коло.

Во првиот меѓусебен дуел одигран на 19 октомври во Загреб, хрватскиот првак триумфираше со 27:18, иако на полувремето беше 10:10.

– Точно е, тие се последни на табелата и немаат освоено ниту еден бод, но тоа не го опишува нивниот квалитет на вистински начин. Еурофарм Пелистер е опасен тим, особено кога се игра дома. Никој не го доби тоа гостување лесно, секој натпревар е многу неизвесен. Така што, очекувам навистина тежок натпревар, како поради квалитетот на противникот, така и поради домашните навивачи, пред кои секогаш е тешко да се игра. Ќе се подготвиме максимално добро и веруваме во бодовите кои ни се многу важни бидејќи ни помагаат на можниот пат за пласман на понатаму – вели во соопштението тренерот на ППД Загреб, Андрија Николиќ.

Николиќ подетално го анализира следниот противник на ППД Загреб:

– Го сменија тренерот, но играта главно остана иста. Разликата е во играчот Кузмановски кој го доведоа и кој е многу важен во нивната игра, тој им дава ритам. Имаат добри голмани, многу добар пивот. Мораме да го прекинеме нивниот контранапад и се надевам дека ќе се прилагодиме на сите услови. Таму е бучно, но и студено. Ќе ни треба смиреност на тој меч, но веруваме во себе – додаде Николиќ.

По девет кола Кил е првопласиран со 13 бодови, пред Алборг и Киелце кои имаат по 12, по девет Колстад, ПСЖ и Пик Сегед, претпоследен е ППД Загреб со осум, а ниту еден на дното Еурофарм Пелистер.