Синдикатот на културата на Република Македонија (СКРМ) остро реагира на новото „упатство“ од Министерството за култура и туризам, обвинувајќи го министерот Зоран Љутков дека се обидува да ги заобиколи колективните договори и правосилните судски пресуди за зголемување на платите.

Според СКРМ, со документот што бил доставен до институциите за време на новогодишните и божиќните празници, Министерството повторно ја воведува формулата позната како „разлика меѓу август и септември 2023“, иако таа веќе била експлицитно поништена од судовите како спротивна на Општиот колективен договор.

Синдикатот истакнува дека „упатството“ нема јасни податоци за авторството и одобрувањето, ниту е разгледано од Комисијата за толкување на колективниот договор, што е предуслов за вакви интервенции. СКРМ најавува дека ќе ги искористи сите правни механизми за заштита на правата на вработените, вклучително и управни спорови и иницијативи за евентуална кривична одговорност.

Во октомври 2025 година, претставници на Синдикатот соопштија дека со добивањето на првата пресуда против надлежното министерство, се потврдува дека правата на културните работници биле прекршени со незаконските решенија за намалување на платите.

Културните работници во април 2025 година протестираа пред Министерството поради тоа што за Велигденските празници не ги добија своите плати, како и непочитување на колективните договори. На ова тогаш министерот Зоран Љутков одговори дека се доцни поради усогласување на платите, но платите потоа беа исплатени со намалување.