Бизнисменот Љупчо Палевски пред неколку дена бил фатен со пиштол без дозвола во близина на тунелите Демир Капија – Јаворица, објави „Вечер“, повикувајќи се на извори во МВР.

Според информациите, Палевски бил затекнат заедно со уште тројца други луѓе со кои барале злато, а кога дошла полицијата, се обидел да го фрли пиштолот, за кој имал дозвола само за поседување, но не и за носење.

„На 05.05.2023 околу 00.30 часот на земјен пат во непосредна близина на тунели Демир Капија-Јаворица, полициски службеници од Полициската станица за граничен надзор Михајлово при Регионалниот центар за гранични работи Југ од лицето Љ.П.(58) од Скопје одзеле пиштол „Валтер“ калибар 9 мм, кој го носел без дозвола“, официјално соопшти МВР во редовниот билтен пред неколку дена.