Легендарната американска скијачка Линдзи Вон за првпат јавно се обрати по тешкиот пад што го доживеа на Зимските олимписки игри, порачувајќи дека и покрај сè нема за што да жали. Сепак, таа откри дека ја очекува сериозен медицински процес, вклучително и неколку операции.

Вон ја заврши трката во спуст во Кортина по само 13 секунди возење, но нагласи дека инцидентот нема никаква поврзаност со нејзината претходна повреда на коленото.

„Вчера мојот олимписки сон не заврши онака како што сонував дека ќе заврши. Тоа не беше крај како во приказна или бајка – тоа беше едноставно животот…“, напиша Вон во емотивното обраќање, детално објаснувајќи дека падот настанал откако со десната рака закачила една од вратите, што довело до губење на рамнотежата и до незгодата.

Таа потенцира дека предните вкрстени лигаменти и старите повреди немале никаква улога во падот, но откри дека се здобила со сложена скршеница која иако моментално е стабилна, ќе бара повеќе хируршки зафати за целосно заздравување.

И покрај болката и разочарувањето, Вон истакнува дека самото присуство на стартната линија било незаборавно искуство и победа само по себе, свесна дека алпското скијање отсекогаш носи висок ризик.

Во пораката, таа повлече паралела меѓу спортот и животот, нагласувајќи дека ризиците, падовите и неостварените соништа се дел од патот, но токму обидот му дава смисла на сè.

„Се обидов. Сонував. Скокнав“, напиша Вон, охрабрувајќи ги сите да имаат храброст да се осмелат и да си дадат шанса, бидејќи, како што вели, единствениот вистински неуспех е да не се обидеш.

Со оглед на тоа што Вон има 41 година и веќе еднаш стави крај на активната кариера, оваа повреда многу веројатно ќе значи и дефинитивно збогување со една од најголемите кариери во историјата на алпското скијање.

 

View this post on Instagram

 

A post shared by L I N D S E Y • V O N N (@lindseyvonn)

Иако падна, Линдзи Вон ќе добие дел од колачот од 100 милиони долари

ИОК: Линдзи Вон одлучи повредена да учествува на Зимските олимписки игри