Поранешниот германски репрезентативец, а сега директор на тамошната фудбалска федерација, Оливер Бирхоф предлага Лигата на нации да се игра во форма на турнир, на неутрален терен.

Бидејќи пандемијата на коронавирус ги блокираше сите спортски настани речиси три месеци, па многу големи спортски натпреварувања се одложени или откажани, се направи „гужва“ во календарите во разни спортови.

Европското првенство во фудбал е одложено за следната година, што создаде проблеми во Лигата на нации, што требаше да започне следната есен, и секоја репрезентација ги игра своите натпревари на домашен и гостински терен.

Македонија веќе ги доби новите ривали во повисокиот ранг „Лигата Ц“, но вниманието е воглавно насочено кон плејоф натпреварите за учество на следното ЕП и полуфиналниот дуел со Косово за што УЕФА треба да донесе одлука за нов термин.

– Форма на турнир би било добра алтернатива – рече Бирхоф за магазинот „Кикер“.

Според него, со оглед дека гледачите нема да можат да ги следат натпреварите од трибините до есен, националните фудбалски федерации полесно ќе се согласат со овој формат на натпреварување. Фудбалерите не би се замориле од непотребни патувања, а контролата на репрезентациите поради коронавирусот би била полесна.

Бирхоф воедно ја нуди Германија како можен домаќин.

– Го имаме потребното знаење и сме одлични организатори, што веќе докажавме. Доколку на тој начин би ѝ помогнале на УЕФА, ние сме подготвени – додаде Бирхоф.

Овој поранешен напаѓач во кариерата ја освои Серија А со Милан, а со германската репрезентација беше европски шампион во 1996 година, а светски вицепрвак во 2002.