Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Приготвувањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и на моите пријатели и токму тоа ми ја полни душата со позитивна енергија – вели таа.

Денеска ви го претставуваме нејзиниот рецепт за зимска салата со брокула и јаболка.

– За сите љубители на слатко-солени комбинации ова е вистински погодок. Доколку не сте љубители на брокулата, нејзиниот вкус не е толку доминантен. Вкусовите толку се совпаѓаат што навистина е неодолива – вели Крстаноска.

Потребни состојки:

• 3 рендани јаболка
• 3-4 рендани моркови
• 1 чаша потпечени ореви
• 1 чаша суво грозје и брусница
• 1 чаша брокула
• 1 ситно исечкан кромид

За дресинг:

• околу 120 г павлака
• 50 г мајонез
• 2 лажици јаболков оцет
• сол
• 3 лажици мед

Подготовка:

Подготовката е навистина едноставна – изрендајте ги јаболката и морковот, па додајте ги сечканите ореви, сувото грозје, брусницата, сечканиот кромид и, на крај, исечканата брокула на помали парчиња.

Ставете од дресингот и дегустирајте.