Крстаноска ќе се обиде со нејзиното меѓународно искуство да помогне и придонесе во остварувањето на добри резултати во наредниот период.

Таа веќе тренира со тимските колешки и се подготвува за настапот во квалификациите од Лигата на шампионите.

Во групата Ц освен Брезница играат уште НСА Софија (Бугарија), Митровица (Косово) и Олимпија Клуж (Романија). Само првопласираната екипа оди во нокаут фазата, а турнирот ќе се одржи на терените во Црна Гора, поточно Никшиќ и Петровац.

– Во среда нè очекува првиот натпревар од квалификацискиот турнир за ЛШ. Верувам дека со добра тимска игра, ќе успееме да постигнеме добар резултат уште на стартниот меч, а се надевам и на останатите два – ни изјави Крстаноска.

Првиот дуел Брезница ќе го има на 7 август од 20.00 часот против НСА Софија, три дена подоцна од 18.00 часот со Олимпија Клуж, а на 13 август ривал е Митровица од 17.30 часот.

Потсетување дека во овие квалификации настапува и нашиот шампион ЖФК Драгон 2014.