СВР Струмица поднесе кривична пријава до Основното јавно обвинителство против поранешниот градоначалник на Струмица, Костадин Костадинов, поради постоење основи на сомнение за сторено кривично дело „злоупотреба на постапката за јавен повик, доделување на договор за јавна набавка или јавно-приватно партнерство“.

Пријави се поднесени и против Д.П.С. (61) од Струмица, К.Б. (37) од Богданци, Л.Ј. (63) од Ново Село и Л.Ѓ. (62) од Струмица за „несовесно работење во службата“, како и против Г.П. (58) од Скопје, кој е осомничен дека помогнал во извршувањето на овие дела.

Според пријавата, Костадинов како градоначалник ги прекршил правилата при јавната набавка на електрични автобуси за ЈСП „Струмица-Транспорт“, ангажирајќи лице без потребните стручни квалификации и лиценца А за технички надзор. Во тендерската документација биле внесени спецификации кои речиси идентично одговарале на автобусите што биле набавени.

Д.П.С., директор на ЈСП „Струмица-Транспорт“, се товари дека пропуштил да спроведе должен надзор врз постапката, а комисијата за јавни набавки, предводена од К.Б. и членовите Л.Ј. и Л.Ѓ., го назначила истото неквалификувано лице како одговорно за реализирање на договорот.

Со овие постапки, ЈСП „Струмица-Транспорт“ набавило 10 електрични автобуси во вредност од 429.933.595 денари, при што е причинета материјална штета од поголеми размери, а под знак прашање биле доведени квалитетот, безбедноста и техничката веродостојност на возилата, велат од СВР Струмица.