Поранешниот градоначалник на Струмица, Костадин Костадинов, вели дека целосно ги отфрла наводите за сомниене за сторено кривично дело во врска со јавната набавка на електрични автобуси во градот.

-Проектот од стратешко значење за општина Струмица од кој, денес во пракса сите жители на општината имаат јасни економски, еколошки и сообраќајни бенефити, процедурално е инициран од Општината, изгласан на Советот на Општина Струмица, со јасни насоки за формирање Јавно Сообраќајно Претпријатие, спроведување на јавна набавка за автобуси и имплементација на проектот – реагира Костадинов.

Тој додаде дека сите овие чекори се спроведени според важечките закони и вели дека тој и сите наведени за кои постои сомневање дека сториле кривично дело, се на располагање за сите надлежни органи и институции, со цел да им биде појаснето на каков начин е спроведен проектот.

„Политички коментар не би сакал да давам“, вели Костадинов.

СВР Струмица претходно соопшти дека е поднесена кривична пријава против поранешниот градоначалник за „злоупотреба на постапката за јавен повик, доделување на договор за јавна набавка или јавно-приватно партнерство“.

Пријави се поднесени и против Д.П.С. (61) од Струмица, К.Б. (37) од Богданци, Л.Ј. (63) од Ново Село и Л.Ѓ. (62) од Струмица за „несовесно работење во службата“, како и против Г.П. (58) од Скопје, кој е осомничен дека помогнал во извршувањето на овие дела.