Постои голем сомнеж за злоупотреба на буџетот на Косово наменет за тешко болните. Дел од болниците во странство ги отфрлија сметките што пациентите ги доставиле до Фондот за здравствено осигурување. Ваквите фактури, за кои постои сомневање дека се лажни, се чини дека издавале болници во различни земји, вклучително и во Кина, пишува Коха.

Новата истрага што ја покрена Државното обвинителство, а сигнализираше Министерството за здравство, упатува на сомнежи дека на Фондот за здравствено осигурување му биле презентирани фалсификувани фактури, со кои се оправдувале услуги кои никогаш не биле понудени во болниците во странство.

Во истражните документи до кои дојде Коха, се гледа дека некои болници негирале до ФЗО дека издавале такви фактури.

Во друг случај ФЗО побарал од една болница да потврди фактури за 11 пациенти, а биле потврдении само два случаи. „Од сите сметки што ни ги испративте, можеме да потврдиме дека нашата болница ги издавала само за двајца пациенти“, велат од „Аџибадем Систина“.

Финансиската вредност на фактурите испратени на потврда во оваа болница е околу половина милион евра. Фондот за здравствено осигурување ги доставил и профилите на тројца пациенти кои рекле дека се лекуваат на клиниката КБЦ во Загреб. Сепак, Клиниката соопшти дека сметките биле лажни.