Една добра одиграна четвртина, онаа втората, им беше доволна на домашните кошаркари на Тиквеш Голден Игл да обезбедат висока предност, и да потврдат дека имаат поквалитетна екипа од онаа на Ангели славејќи со 114:90 во „МТЕЛ“ Супер лигата.

Во првиот период од играта, гостите од Скопје парираа доста добро, и не им дозволија на кошаркарите на Тиквеш Голден Игл да не се одвојат уште во таа почетна фаза од мечот во салата „Јасмин“ во Кавадарци.

Но, по оние 22:17, кои ги имаа домаќините, во вториот период, заиграа уште поефикасно. За 10 минути реализираа 30 поени, примија двојно помалку, па на полувремето веќе има плус од 20 поени (52:32).

Во продолжението, следуваше доста поизрамнета игра. Кавадарчани продолжија со максимален интензитет во нападот. Можеби не и во фазата на одбраната, па во третиот период од играта на двете страни беа реализирани вкупно 62 поени, поделени подеднакво. И без промена во резултатот (83:63).

На крајот, дури шестмина домашни кошаркари имаа двоцифрен број на поени. Најмногу, 24, постигна Хоукинс, три помалку имаше Парсонс, Димитриев даде 18, а Златев и Бошалески по 14. На другата страна од теренот, Хоуг уфрли 25, Стефанов 20, Ренг 17, а Лазарев уште 10 поени.