Конте го доби првиот „подарок“ во Интер
Антонио Конте во петок ќе ја има официјалната презентација како нов тренер на Интер. Тој доаѓа како замена за Лучано Спалети, кој откако го однесе тимот во Лигата на шампионите, доби отказ.
Сè уште неседнат на клупата на „нероаѕурите“, Антонио Конте веќе доби „подароци“ од управата на тимот со најава дека летово уште ќе се вложува во засилувања. Диего Годин е првото засилување на Интер, тој минатиот месец потпиша договор, а денеска Конте доби уште еден фудбалер кој е по негов вкус, Николо Барела од Калјари.
Тимот од Милано се согласи да плати 35 милиони евра на Калјари како обесштетување и го претрка Јувентус, кој исто така беше заинтересиран за младиот италијански репрезентативец.
Следен на листата е Един Џеко за кого Рома бара 15 милиони евра и договорот се очекува да биде постигнат во наредните 10-тина денови.
Директорот Бепе Марота на новиот тренер му ветил уште неколку засилувања. Матео Дармијан кој играше одлично за репрезентацијата додека Конте беше селектор, е планиран како засилување во одбраната, додека за крај на преодниот рок и комплетирањето на тимот со кој ќе се нападне Јувентус во Серија А, се цели кон Киеза од Фиорентина и ѕвездата на Јувентус, Пауло Дибала.