Градоначалникот на Општина Аеродром, Дејан Митески, денеска информираше дека во тек е реконструкција на еден од краците на булеварот „Трета македонска бригада“, поточно кај зградата каде што е сместена компанијата „Метро“, како дел од најавениот проект за реконструкција на 19 улици во општината.

Митески соопшти дека овој проект, вреден 17.9 милиони денари, ќе ја опфати целата делница во должина од 777 метри, која ќе добие 6.000 квадратни метри нов асфалт, нови тротоари и улично осветлување.

-Станува збор за проект со кој за првпат темелно се обновува овој значаен сообраќаен потег во Општина Аеродром. Делницата е во должина од 777 метри, со поставување на околу 6.000 м² нов асфалт, како и тротоари со вкупна површина од 1.500 м². Особено е важно што за првпат се поставува и улично осветлување, кое значително ќе ја зголеми безбедноста на граѓаните и ќе придонесе за подобар и посигурен сообраќај. Оваа улица е многу фреквентна – ја користат жителите од околината, но и голем број компании што функционираат во овој дел на Аеродром- соопшти Митески.