Колинда: Вакцината против ковид-19 е дел од решението, а не проблем
Некогашната хрватска претседателка Колинда Грабар-Китаровиќ учествуваше на онлајн конференција за инвестиции во спортот организирана од Хрватската трговска комора, по што кратко разговараше со новинарите.
Грабар-Китаровиќ изјави дека и таа и нејзиното семејство сигурно ќе се вакцинираат против ковид–19.
– Против грип се вакцинирам од 1993 година, кога последен пат имав грип и тешко го поминав иако имав 25 години. Вакцината е дел од решението, а не проблем. Да не заборавиме дека денес немаме детска парализа благодарение на вакцината – изјави Колинда.
Грабар-Китаровиќ повика на солидарност со оние кои се најзагрозени од коронавирусот и на кои, како што рече, вирусот може да им наштети.
– Треба да се придржуваме кон мерките и да постапуваме одговорно и на тој начин да се заштитиме себеси и другите – нагласи Колинда.