Макс Верстапен веќе ја освои титулата во Формула 1, а сезонава постави и неколку рекорди.

Холанѓанецот до крајот на сезонава сигурно ќе го собори рекордот на Себастијан Фетел во освојување на вкупната титула со најголема бодовна разлика пред второпласираниот.

Германецот во 2013 година ја освои титулата со разлика од 155 поени во однос на Фернандо Алонсо кој беше на второто место, што е се уште актуелен рекорд.

Но тој ќе биде сигурно соборен.

Моментно Верстапен има предност пред второпласираниот Серхио Перез од 266 поени. Чеко до крајот на сезоната може да освои максимум 52 поени па дури и Макс да не освои ниеден, тој сепак ќе има предност од најмалку 214 поени, што значи веќе го има тој рекорд в џеб, а само треба да се формализира со крајот на сезоната.

Шампионот на Ред бул, сепак не може да го собори рекордот на најмногу освоени пол-позиции, што го има Фетел кој во 2011 година имаше 15 пол-позиции во 19 трки.

Верстапен моментно има 11 пол-позиции од 21 трка и дури и да биде на чело на стартот во преостанатите две трки во Лас Вегас и во Абу Даби, не може да го собори тој рекорд на Германецот.

Верстапен сезонава веќе постигна четири рекорда. Холанѓанецот веќе е на врвот на топ-листите за најмногу победи во една сезона (17), најмногу победи во низа (10), најголем процент на освоени трки (85) и најмногу освоени поени (524) пред последните две трки.