Еден ден по Лазаровата сабота, во последната недела од велигденскиот пост, се прославува празникот Цветници, кој го симболизира влегувањето на Исус Христос во Ерусалим.

Празникот Цветници, познат уште и како Цветоносна недела и Врбица е подвижен празник, секогаш се слави во неделата пред Велигден.

Името го добил по расцутеното гранче палма кое Исус го носел во рака при овој свечен чин.

Тоа е денот кога го доживуваме Христовото славно влегување во Ерусалим, градот во кој по неколку дена Христос ќе биде погубен.

Неделата, една седмица пред Велигден е празникот Цветници познат уште и како Цветоносна недела и Врбица, што се празнува во спомен на влегувањето на Исус во Ерусалим, кога неговите ученици и симпатизери кршеле цвеќе од дрвјата и врбови гранки и со нив, како и со својата облека му го постилале патот по кој минувал. Саботата пред Цветници се вика Лазарова Сабота или Лазарица, односно Лазара. Според преданието, во саботата умрел Лазар од Витанија, а во неделата Исус го воскреснал. Поради тоа во народот неделата се смета за поголем празник од саботата.

Кога Христос влегуваше во Ерусалим, луѓето го пречекуваа со извици, постилајќи ги облеките пред неговите нозе и засипувајќи го патот со маслинови гранчиња пречекувајќи го како цар на мирот небесен. Во таа смисла и празникот е наречен Цветници.

Според толкувачите на Светото писмо, Исус влегол во Ерусалим качен на магаре затоа што кај источните народи магарето било симбол на мирот, наспроти коњите што служеле за водење војни. Магарето мирно му служело на човекот како што Исус му служел на народот.

Пречекувајќи го Исус, воодушевениот народ со цвеќе, но и со својата облека го постилал патот и пеел: „Осана на синот Давидов. Благословен е оној кој доаѓа во името Господово. Осана на вистините.“ Во спомен на влегувањето на Исус во Ерусалим уште од најрани христијански времиња е востановен празникот Цветници, кој се празнува од третиот век.

Карактеристично за овој празник е што и покрај тоа што се смета за голем, не значи дека не треба да се работи – напротив, ова е одличен ден за земјоделците, особено за оние кои одгледуваат лен и зелка.

Исто така, Цветници е и одличен празник на кој можете без грижа на совеста да започнете нешто ново или да носите важни одлуки.

Според верувањата, симбол на последниот викенд пред Велигден се копривата и врбата, па затоа во многу традиционални домови можете да видите украси токму од овие растенија.

На овој ден именден слават оние кои носат имиња изведени од некое цвеќе, на пример Цветанка, Цвета, Цветан, Ружица, Роза, Лилјана итн.