Книгата „Со свои зборови: интервјуа (1985-2023)“ претставува прошетка низ времето, нѐ враќа на самите почетоци на сликарската кариера на Сергеј Андреевски. Таа прошетка се личните ставови на еден македонски ликовен уметник со меѓународна кариера за уметноста, животот и секојдневното битисување искажани во серија интервјуа, разговори и изјави, почнувајќи од 1985-тата година, па сѐ до 2023 година.

Промоцијата на книгата ќе се одржи на 14 ноември, од 19:19 часот, во „Салон 19:19“ во Културно-информативниот центар ‒ Скопје. Промотор на книгата ќе биде Јулијана Величковска од „ПНВ Публикации“.

Сергеј Андреевски (1960, Скопје) е академски сликар и основач на меѓународниот центар за уметност и одржлив развој „Арт поинт – Гумно“, со седиште во с. Слоештица, каде што е и куратор на Меѓународната уметничка резиденција и колонија, што успешно се реализира од 2003 година.

Дипломирал на Факултетот за ликовни уметности во Скопје во 1985 година, а бил и стипендист во Рим („Галерија ди арте модерна“, 1987/’88) и во Нирнберг во 1991 година. Од неговите позначајни студиски престои во странство може да се издвојат: Архус, Данска; „Cité des Arts Internationale-Paris“, Франција; „Acme Art Studios“, Вилмингтон, САД; „Asolare Fine Arts Foundation“, Лексингтон, САД; „Imadate“, Јапонија; „Pi Artworks“, Истанбул, Турција; „Cromarty Arts Trust“, Кромарти, Шкотска; „In Situ“, Александрија, Египет; „Al Maken“, Тунис и многу други.

Сергеј Андреевски реализирал повеќе од 60 самостојни изложби низ целиот свет и учествувал на повеќе од 200 групни изложби. Добитник е на многу државни награди. Неговите дела се дел од збирките на бројни државни институции, музеи и приватни колекционери ширум светот.