Ќерката на севернокорејскиот лидер Ким Џонг Ун ја оствари својата прва официјална посета на семејниот мавзолеј, каде што почиваат нејзиниот дедо Ким Џонг Ил и прадедо Ким Ил Сунг, поранешни лидери на еднопартиската држава, според снимките објавени од официјалните медиуми, пренесува Еј-би-си њуз.

На фотографијата објавена од KCNA, тинејџерката е фотографирана меѓу нејзините родители – сегашниот лидер на земјата и првата дама – и опкружена со десетици функционери, политичари и воен персонал, во Палатата на сонцето Кумсусан, во главниот град Пјонгјанг.

Експертите го протолкуваа изгледот на младата жена како уште еден знак дека Ким ја подготвува својата ќерка да го наследи.

Девојчето првпат се појави на фотографии од државните медиуми во 2022 година и оттогаш е видено како го придружува својот татко на разни големи настани, од ракетни тестови и инспекции на системи за оружје до неговата посета на Кина минатата година.

Официјално, малку детали се објавени за детето. Нејзината возраст, па дури и нејзиното име, никогаш не се објавени од официјалните медиуми.

Поранешниот кошаркар Денис Родман, кој се сретна со Ким за време на неговата посета на Северна Кореја во 2013 година  (познато е дека изолационистичкиот лидер ги обожавал Чикаго Булс и особено Мајкл Џордан), открил дека името на девојчето е Џу Е. Се проценува дека има 13 или 14 години.

Северна Кореја е управувана од семејството Ким уште од нејзиното основање, а нејзиниот основач и неговиот син секогаш се нарекувале „вечни лидери“ во официјалниот пропаганден материјал.

Јужнокорејските разузнавачки служби веруваат дека е речиси сигурно дека ќерката на сегашниот лидер еден ден ќе стане четврта генерација на династијата што ќе ја преземе власта.

ФОТО | Ким Џонг-ун изврши инспекција на нуклеарна подморница од 8.700 тони