Постепено ублажување на рестриктивните мерки почнува од денес на Кипар, со отворање на берберниците, фризерските и козметичките салони, откако на десети јануари беа воведени карантин и полициски час. Вработените во приватниот сектор место од дома се враќаат на работа, со тоа што нивниот број ќе се зголеми до 50 отсто. 

Полицискиот час кој трае од 21 часот до пет чаот наутро останува на сила како и задолжителното испраќање СМС пораки за движење на граѓаните. Забраната за собирање во домовите е продолжена, а дозволена е посета од најмногу две лица кои се најблиски роднини.

Министерот за здравство на Кипар, Константинос Јоану на неговиот официјален твитер-профил, утрово напиша дека земјата од денес почнува со укинување на рестриктивните мерки со надеж дека е почеток на излегувањето од карантинот, и дека нивната стратегија е базирана врз тестови, протоколи и вакцини и ги повика граѓаните кои се враќаат на работа да се тестираат со брзите тестови и да ги почитуваат протоколите.

Во втората фаза од ублажувањето на мерките, која почнува следната недела, планирано е во училиштата да се вратат учениците од основните училишта и матурантите, да се отворат продавниците, моловите и трговските центри, обложувалниците, музеите и археолошките локалитети, црквите, а во домовите да бидат дозволени посети на најмногу четири лица. Од почетокот на епидемијата, на Кипар се регистрирани вкупно 30.876 случаи на Ковид-19, а починаа 199 лица.