Легендарната актерка Ким Новак јавно се спротивстави на изборот на Сидни Свини за да ја толкува во претстојниот биографски филм „Скандалозно“ (Scandalous).

Ѕвездата од „Вртоглавица“ (Vertigo) изјави дека никогаш не би го одобрила кастингот, оценувајќи дека Свини „воопшто не одговара“ за таа улога.

Филмот ќе ја обработува нејзината контроверзна љубовна врска со Семи Дејвис Џуниор од 1950-тите години, а според Новак, постои опасност приказната да биде сведена само на физичка привлечност.

„Нема шанси тоа да не биде прикажано како сексуална врска, бидејќи Сидни Свини изгледа секогаш секси. Таа е сосема погрешна да ме игра“, изјави актерката.

Новак нагласи дека нивниот однос бил многу подлабок и се темелел на заеднички вредности, а не само на страст.

Во интервјуто, таа се осврна и на расизмот со кој се соочувал Дејвис во Холивуд, истакнувајќи дека поради бојата на неговата кожа бил изложен на неправди.

Актерката зборуваше и за контролата што ја имале филмските студија врз неа во раните години од кариерата, посочувајќи дека била под постојан надзор и притисок.

Филмот „Скандалозно“ ќе го режира Колман Доминго, а снимањето сè уште не е започнато.