Киев ќе одржи консултации со Соединетите Американски Држави во Швајцарија за прекинување на војната на Русија против Украина, изјави во вторник висок украински безбедносен функционер.

-Започнуваме консултации во Швајцарија меѓу високи функционери на Украина и Соединетите Американски Држави за можните параметри на идниот мировен договор –  напиша Рустем Умеров, секретар на Советот за национална безбедност и одбрана, на Телеграм.

Го цениме учеството на американската страна и нејзината подготвеност за суштински разговори“, додаде тој.

Умеров ја измени објавата, без да наведе причина, откако во претходната верзија беше наведено дека разговорите ќе се одржат „со учество на европски партнери“.

Претседателот Володимир Зеленски го одобри составот на делегацијата за разговорите, која ќе ја предводи шефот на неговата канцеларија и вклучува високи безбедносни функционери, според соопштението од неговата канцеларија на Телеграм.

Тој, исто така, ги одобри упатствата за преговорите.

„Украина никогаш нема да биде пречка за мир, а претставниците на украинската држава ќе ги бранат легитимните интереси на украинскиот народ и темелите на европската безбедност“, се наведува во соопштението на претседателството.