Атмосферата на грен-слем турнирите треба да е на висина и пример за останатите турнири ширум светот. Но на Ролан Гарос тоа не е така, ако се суди според сведоштвото на Миомир Кецмановиќ, кој го изгуби мечот со домашниот тенисер Кентан Алис во четири сета.

По мечот Србинот се жалеше на однесувањето на домашната публика, која не се воздржувала да го попречува на секаков начин, па дури и со плукање.

– На овој терен е поизразено отколку на други терени, сите се блиску. На поголем терен…, не се толку блиску до вас, не можат да плукаат по вас и да фрлаат работи по вас. Плукнаа и по мене. Се согласувам, домашен играч, сè е во ред, но ова е безобразие. Некои луѓе се справуваат подобро, некои полошо – изјави Кецмановиќ по поразот во второто коло од 4-6, 6-3, 7-6 (7-2), 7-5.

Кецмановиќ играл на озлогласениот терен 14, на кој трибините се близу до теренот.

– Атмосферата беше ужасна, беше ужасно чувство. Веројатно му помогна, немаше да биде вака ако тие не беа таму – вели Кецмановиќ, а пренесува Спортклуб.