Ќе никне ли хотел кај дискотеката „Парк“?
Се планира изградба на нов хотел на самиот брег на Охридското Езеро, во непосредна близина на хотелот „Горица“ и на Студенчишко Блато, предупредуваат од невладината организација „Охрид СОС“, чиишто активисти деновиве забележале подготвителни работи на објектот на некогашниот ресторан „Парк“.
Објектот на ресторанот е во првата зона, односно во појасот од 50 метри од Охридското Езеро, каде што, според Планот за управување со светското природно и културно наследство на Охридскиот Регион е забранета надградба или доградба на постојните објекти и изградба на нови. Познатиот охридски архитект Павел Балабанов за овој проект во 1989 година доби специјалното признание на Биеналето на Македонската архитектура и е вброен во охридското архитектонско наследство на 20 век.
Локацијата, на која се наоѓа ресторанот и дискотеката „Парк“, ѝ припаѓа на катастарска парцела за која досега не е усвоен детален урбанистички план (ДУП). Според Службениот гласник, во делот на деталните детално урбанистички планови финансирани од приватни иницијативи, Општината има обврска да изработи ДУП за оваа локација.
– Во податоците за објектот стои „класа А2-1“, што според Правилникот од најновиот Закон за урбанистичко планирање е „мали станбени згради до 10 станбени единици, слободностоечки“. Класа А2 се станбени згради, што некако нема логика според намената на објектот претходно, кој е приземен објект наменет за угостителство, или во меѓувреме се направени одредени измени – за „Слободен печат“ вели Драгана Велковска, активист на „Охрид СОС“.
Таа додава дека не добиле информации од институциите на каков начин и под кои услови им е отстапено на користење државното земјиште каде што се базенот и игралиштата. Претходното искуство е негативно со оглед на тоа колкаво здание се издигнало на местото на некогашниот хотел „Парк“, кој беше многу помал по обем и висина.
Општина Охрид не одговори на прашањата од „Слободен печат“ за тоа што ќе се гради на оваа локација, на самиот брег на езерото и дали ваквата градежна експанзија е во склад со препораките на УНЕСКО и на заложбите на Владата за почитување на забелешките на реактивната мисија на оваа организација. Неофицијално, парцелата има неколку сопственици, и тоа градежни компании што градат и други објекти на охридското крајбрежје.