Колку пати ви се случило да наидете на фотографии од профил што го следите на некоја од социјалните мрежи и веднаш да не се чувствувате удобно во сопствената кожа?

Отсекогаш знаевме дека кампањите за убавина и мода се нерелани, измислени, рафинирани и некако го прифативме тоа како дел од нашето секојдневие. Можеби не ја поддржуваме секоја, но овие совршени лица што ги гледаме во списанијата или билборди низ градот несомнено ги доживеавме како„бајка“.

Со ерата на социјалните мрежи, обработката на фотографии преку разни апликации и филтри стана толку едноставна што веќе секој на својот профил од некоја од социјалнтие мрежи може да ја претставува својата „бајка“. Инфлуенсерите се будат наутро со толку „совршен тен“ што нашите мозолчиња добиваат монструозна форма и почнуваат да нè прогонуваат.

Иако знаеме дека сите овие лажни претставувања се далеку од реалноста, тие некако нè прават помалку сигурни и задоволни во сопствената кожа.

Хиперпигментација, флеки, пори, дамки, црнки, мозолчиња – сè што е природно стана непожелно. Но модните брендови кои се виновни за денешниот поим за идеална и, пред сè, недостижна убавина во последните неколку години се чини дека почнале да ја прифаќаат нормалноста.

Сега сите големи модни брендови почнаа кампањи за таканаречената „природна убавина“, славејќи ги сите „несовршености“. Веќе сме сведоци на „plus size“ модели на модните писти или истакнати облини во спортски кампањи.

Но, што се случува со лицето? За среќа, почна и тоа да се менува. Брендот „Skin Proud“ започна нова кампања преку која испраќа силна порака „Биди горд, не совршен“. Оваа кампања, освен што испраќа силна порака, оди и чекор подалеку. Преку петиција, тие бараат забрана за употреба на „Photoshop“ во реклами за убавина.

Тие ја испраќаат оваа порака со впечатлива визуелизација, споредувајќи убави лица со скоро совршена кожа и нереално убави лица кои се „пласираат“ под „нормално“ со децении.

Брендот нагласува дека никој не смее да се чувствува несигурен во својата кожа и дека е време да престане прикажувањето на совршени идеали. Овој бренд за убавина е познат по тоа што ја промовира вистинската убавина, нагласувајќи дека на кожата не ѝ треба решение, туку движење.

Треба да бидеме реални. Треба да разговараме. Да се отстранат сите филтри и словеи на „Photoshop“ за секој да може гордо да застане пред огледалото, да сфатиме дека она што го гледаме во него е сосема нормална слика за убавината.