Најтешките последици од корона-кризата, според проценки на релевантни меѓународни организации, ги трпат авиокомпаниите и работниците во туристичкиот сектор.

Потенцијалната глобална загуба на бруто приходот на авиокомпаниите ќе биде меѓу 389 милијарди и 391 милијарда долари во текот на целата 2020 година, проценува Меѓународната организација за цивилно воздухопловство (ИКАО) во својот последен извештај за ноември.

Во документот објавен на официјалната веб-страница на ИКАО, вкупниот пад на бројот на патници во авионите ќе достигне помеѓу 2,87 и 2,88 милијарди луѓе оваа година, со што вкупниот број на понудени авионски места е преполовен (пад од 51 процент).

Организацијата проценува и дека авионскиот сообраќај на патниците нема да се врати на нивото на кое беше пред појавата на пандемијата на ковид-19 до 2024 година.

Меѓународната асоцијација за воздушен транспорт, пак, очекува вкупната загуба на приходите на авиокомпаниите да изнесува 419 милијарди долари, со негативен финансиски резултат од 84,3 милијарди долари.