Македонските одбојкарки на Јанта Волеј започнаа со триумф своето историско учество во ЦЕВ Лигата на шампиони, совладувајќи го босанскиот состав Гацко со 3-2 во возбудливо полуфинале од квалификациите за елитното европско натпреварување.

Натпреварот донесе многу драма, иако Гацко поведе рано со 5-1 во првиот сет, Јанта Волеј се стабилизира и со сигурна игра го освои сетот со 25-21. Во вториот сет, босанската екипа возврати на ист начин и израмни на 1-1 (21-25).

Третиот сет повторно им припадна на македонските шампионки, кои со цврста и концентрирана игра го добија со 25-22. Но, Гацко не се откажа, Јанта имаше почетна предност од 8-5, а домаќинките направија серија и поведоа со 18-12. Јанта успеа да израмни на 18-18, но Гацко сепак го освои сетот со 25-20 и избори тај-брејк.

Во решавачкиот петти сет се водеше голема борба за секоја топка, а на крајот со 18-16 подобри беа одбојкарките на македонскиот претставник.

Реванш средбата која ќе реши кој патува понатаму во ЛШ е закажана за 29 октомври со почеток од 18 часот.

Преземено од: Спорт.ком.мк