Израел и Хезболах водат војна среде напорите за мир – загина двегодишно девојче на погребот на татка си
Седумгодишната сестра на загинатото девојче завршила со тешки изгореници и била во болница за време на погребот, завиткана во слоеви окрвавена газа. Нивниот дедо, 63-годишниот Насер Саид, за малку го избегнал нападот.
Израелските воздушни напади и ракетните напади на Хезболах се засилија за време на викендот во јужен Либан и во северен Израел, при што двете страни сигнализираа дека војната ќе продолжи и покрај дипломатските напори, а најновата жртва е двегодишно девојче, објави „Би-би-си“.
Препорачано
Либанското министерство за здравство соопшти дека, откако борбите повторно се разгореа на 2 март по напад на Хезболах врз Израел, во израелските напади загинале 2.055 луѓе, меѓу кои 167 од петокот наваму. Во истиот период, според израелските власти, од напади на Хезболах загинале 12 израелски војници и двајца цивили.
Борбите продолжија и покрај прекинот на огнот меѓу САД и Иран, за кој Израел вели дека не се однесува на неговата кампања во Либан.
Либански, израелски и американски претставници треба да одржат разговори во Вашингтон во вторник.
Кабинетот на либанскиот претседател за „Би-би-си“ изјави дека разговорите ќе бидат насочени кон условите за прекин на огнот и дека би можеле да следуваат формални преговори ако се постигне договор.
Хезболах, меѓутоа, ја отфрли иницијативата и одржа протести во центарот на Бејрут, каде поддржувачите вееја знамиња на Хезболах и носеа фотографии од покојниот лидер на групата, Хасан Насрала, кој беше убиен од Израел во 2024 година.
Израелската амбасада во Вашингтон соопшти дека одбила да разговара за прекин на огнот со Хезболах и дека овие разговори ќе претставуваат почеток на формални мировни преговори.
Загина двегодишно девојче
Меѓу најновите жртви на бомбардирањето за викендот беше и Талин Саид, девојче на возраст од нешто помалку од две години.
Таа преживеала напад врз семејниот дом во јужен Либан минатата среда, но загинала кога друг удар погодил за време на погребот на нејзиниот татко.
Нејзината седумгодишна сестра Алин се здобила со тешки изгореници и во тоа време била во болница, завиткана во слоеви окрвавена газа. Нивниот дедо, 63-годишниот Насер Саид, за малку го избегнал нападот.
– Ова не е човечност. Ова е воено злосторство. „Каде се човековите права? Ако едно дете – дете – е рането во Израел, целиот свет скока. Зар ние не сме луѓе? Зар не сме човечки суштества? Ние сме како нив! – изјави Саид за новинската агенција „Ројтерс“.
Во неделата, либанскиот премиер Наваф Салам изјави дека напорите за ставање крај на конфликтот продолжуваат, иако борбите се засилуваат.
– Ќе работиме за да ја запреме оваа војна и да обезбедиме израелско повлекување од целата наша територија. Ги продолжуваме нашите напори… преку преговори да ја запреме војната – рече Салам во телевизиско обраќање.
Нетанјаху зазеде попркосен тон
Во меѓувреме, израелскиот премиер Бенјамин Нетанјаху зазеде попркосен тон за време на посетата на израелските трупи што навлегоа во јужен Либан.
– Војната продолжува, вклучително и во безбедносната зона во Либан. Ја спречивме заканата од инвазија од Либан благодарение на оваа безбедносна зона – рече тој.
Израел претходно објави создавање на, како што ја опиша, безбедносна тампон-зона што се протега осум до 10 километри внатре во либанската територија, велејќи дека потегот е неопходен за заштита на израелските заедници од нападите на Хезболах.
Либан мислеше дека има прекин на огнот, Израел започна смртоносен блиц
Вчера беа пријавени силни израелски воздушни напади во десетици градови во јужен Либан, вклучително и во Бинт Џбеил, место на жестоки борби за време на војната меѓу Израел и Хезболах во 2006 година.
Израелските одбранбени сили (ИДФ) соопштија дека трупите убиле повеќе од 20 борци на Хезболах кои дејствувале од комплекс на болница во Бинт Џбеил.
Либанското министерство за здравство го негираше ова тврдење, обвинувајќи го Израел дека гаѓа цивили и медицински установи.
Во нападите за време на викендот беа погодени и спасувачи, при што загина еден спасувач од либанскиот Црвен крст.
Организацијата соопшти дека нивниот тим бил „директно нападнат од израелски дрон“ додека извршувал хуманитарна мисија. Би-би-си побара коментар од ИДФ.
Оваа смрт е втор случај на убиен волонтер на Црвениот крст во последните недели.
Либанските власти велат дека повеќе од 80 спасувачи и медицински лица биле убиени во израелски напади од почетокот на војната.
Привремените сили на Обединетите нации во Либан (УНИФИЛ), исто така, пријавија конфронтации со израелските трупи, наведувајќи дека израелски тенкови удриле во две мировни возила во два одвоени случаи, предизвикувајќи значителна штета.
Како одговор, ИДФ соопшти дека УНИФИЛ не ги координирал своите движења со израелските сили однапред и дека не дејствува против УНИФИЛ, ниту, пак, против либанските цивили.
Страдањето на цивилите продолжува да расте, при што околу 1,2 милиони луѓе се раселени низ Либан, а десетици илјади и во северен Израел, додека конфликтот влегува во уште една недела на интензивни борби.
ВИДЕО | Израел изврши крвав напад врз Либан: загинаа осум луѓе, оштетена е болница
