Изненадување во Купот: ЖРК Металург е првиот финалист

ЖРК Металург по осум години повторно се бори за Куп трофеј/Фото: zrk.rkmetalurg.mk

Денеска во првото полуфинале од завршницата на женскиот ракометен Куп на Македонија кој се одржува во Кавадарци, екипата на ЖРК Металург приреди изненадување.

Во спортската сала „Јасмин“ тимот од Автокоманда во полуфиналниот меч го елиминираше ланскиот шампион ЖРК Куманово со резултат 25:21.

Првото полувреме не најавуваше дека на крајот ќе се радува скопскиот тим, бидејќи ЖРК Куманово имаше предност од 12:10 на паузата, а во еден период стекна и „плус три“ (9:6).

Куманово добро го започна и вториот дел, одржуваше предност од три голови разлика (14:11, 17:14), а на 15 минути до крајот на средбата дојде и до највисоки 18:14.

Следуваше пресвртот, односно ЖРК Металург направи серија од 5:0 за преземање на водството од 20:19. Продолжи кризата во редовите на ЖРК Куманово, а тоа го користеше неговиот противник кој се одвои на „плус три“ и до крајот успешно ја задржа позитивата.

Големата македонска ракометна надеж, Младеновска во победничките редови реализираше 10 голови. На спротивната страна нашата репрезентативка, десниот бек Кипријановска деветпати се запиша во листата на стрелците.

Противник на ЖРК Металург во финалето в недела (17.00 часот) ќе биде победникот од втората полуфинална пресметка меѓу ЖРК Ѓорче Петров и ЖРК Чаир.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот