Ива Кацарска Саздовска, креаторка која ја приближи топлината на дрвото за луѓето да ја примат во своите домови и срца
Сè започнало со трупчиња и гранки на кои Ива постојано им наоѓала своја примена, за цвеќе, за алишта, како столна ламба…, и додека се освестила дома имала шанк-плотна од орев, клуб маса, полици, даски за храна…
Ива Кацарска Саздовска по професија е шумарски инженер, работи пејзажно и просторно планирање, а љубовта кон дрвото ја следи од одамна со постојано вметнување на некој природен дрвен елемент во домот, а во последните години сè почесто.
– Отсекогаш ме привлекувал бохо стилот со елегантна рустичност и „трајбал“ (tribal) форми. Нијанси на бело и сиво со вметнување на природни елементи од дрво во домот и по некој детаљ во боја доволно за да го разиграат просторот.
Па така почнав да експериментирам со дрвени трупчиња и даски за сервирање. Идеите само надоаѓаа и со леснотија ги креирав и решив да ги објавам. Повеќе ме интересираше реакцијата за нив и за среќа беше мотивирачка, така продолжив во тој правец – ни вели Ива.
Материјалите главно ги зема од пилани и од столари кои препродаваат масивно сушено дрво. Тие се необработени и потребно е неколкудневна подготовка за да се дојде до финалниот изглед.
– Сè започнува со креирање на формата и постојано мазнење – шмирглање. Потоа нахранување на дрвото и заштита со премази, сушење, персонализирање и повторно лакирање. Бидејќи се работи за природен елемент, дрвото „дише“, се движи, потребно е трпеливо да се работи за да му се дозволи да ги апсорбира сите подготовки. Да напоменам, јас не сум експерт и кажувам за моето искуство – објаснува таа.
Вели дека поголемиот дел е физичка работа и треба енергија, љубов и трпение. Покрај домашните активности и професијата, Ива секогаш нема време, но за среќа, тука се нејзините пријатели и соработници и многу ѝ олеснува кога ќе ја сподели работата. Се смее дека кога работи изгледа како градежен работник.
Природата за Ива е најголема инспирација, од една страна – скриени песочни плажи каде што природните влијанија совршено го дизајнирале екстериерот и „осветлувањето“, а од друга страна животот на планина.
– Сè што е природно има енергија што го храни човечкиот дух, и во зависност од тоа што сакам да го постигнам, се служам со тие форми, бои и текстури. Може да е одредено цвеќе што цвета во сезоната, може да се сенки, може да е нежно песочно утро, шара на инсект, и така до бескрај – ни раскажува оваа креативка.
Во понудата на Ива се и персонализираните изработки за секој да има шанса да ја преслика својата замисла и да ја доживее на свој начин.
Во моментов, освен на даските (посетете ја Фејсбук страницата на Ива – ТУКА), Ива работи на нешто ново што го нема во нашите домови. Дрвени мозаици, ѕидни елементи, лизгачки врати, масички, послужавници, и тоа мултифункционални, со цел да ја приближи топлината на дрвото, а луѓето да ја примат во своите домови и срца.